Molo laho hita tu Universitas Katolik Parahyangan (Unpar) di luat Bandung laho manukkun tu akka pangisi ni sikkola i ise do ulaning amanta Mangadar Situmorang, dang pola maol dapotonta i. Boasa? Alana amanta na tubu di Samosir taon 1964 on ma nuaeng na gabe rektor disi. Lumobi muse, dung marpiga-piga taon marhinaloja amanta on mangajari akka mahasiswa ni Unpar i, nunga tong diangkat ibana gabe Dekan Fakultas Ilmu Sosial dan Ilmu Politik Unpar sian taon 2011. Godang situtu angka paniroion dohot pangajarion sian amanta na hobbi manggombar on na boi sirimang-rimangon jala sipabagas-bagason di roha nang pikkiran.

Ia mardomu tu barita na tarsar i ma taringot tu sakkap ni pamarentanta na laho padengganhon Tao Toba gabe adangan wisata na ummuli, amanta on pe tung mansai balga do panghirimonna asa boi ma nian marhitehon i gabe dumenggan luat na humaliang Tao Toba i, suang songon i ma nang pangisina. Ditingki dekan FISIP dope amanta on, ibana ma sada na tarmasuk tu Tim Penyusunan Detail Engineering Design Ekowisata Huta Ginjang Kecamatan Sianjur Mulamula, i ma na ibentuk di taon 2013. On ma sada tim na mamparsiajari angka aha ma na porlu sibahenon dohot siparrohahonon laho padengganhon huta na humaliang tao i. Sian i boi ma nasida mangalehon akka tudu tudu na denggan tu pamarenta laho mambangun tao i.

Sakkap na uli do on. Jala ikkon ma hita parsidohot dison asa unang gabe manghorhon angka na hurang denggan nian hadohoan ni ulaon on. Rupani, manat ma nian hita mandongani jala jamot manailihon lakka ni pamarentanta asa unang holan gabe adangadangan ni akka wisatawan sambing tao na uli i, alai huhut ma nian i mamboan hadengganon tu tao i sandiri suang songon i manisia na tinggal di humaliangna“, inna amanta on ma tikki manghata-hatai dohot BatakTobaNews.com.

“Ai jumolo do padengganon tao naung marsik i, tapaune akka hadirionta masyarakat na mangingani huta na humaliang, marhitehon i pe asa boi lam humajuna hita suang songon i luat i”, ninna manambai.

Ia didok amanta Mangadar on pe hatana sinangkinan, tudos do i tu hadirion na naung godang itanda masyarakat, tarlumobi ma di Unpar. Agia pe di zaman saonari lam godang rupani akka sikkola na holan patigatigahon pendidikan boha ma asa manghojot pagodang-godanghon na di ibana sambing, alai amanta Situmorang on hot do di tu ugasan na patut ulahonon ni sahalak guru. “Ai panjouon na uli do ulaon sisongon on. Boha asa lam godang parsikkola i lam malo, jala marhite hapistaran i gabe boi i dalan ni nasida mangalului ngolu na dumenggan di dirina sandiri dohot masyarakat, i do na parjolo. Jala unang ma nilupahon i,” inna amanta Mangadar songon na nienet sian Media Parahyangan.

Sian on, boi ma tabereng na domu do pandapotna taringot tu pendidikan suang songoni tu hamajuon ni Tao Toba dohot na humaliang. “Hamajuon ni jolma i dohot haulion ni luat i, apala i ma impola naso boi tadinghononta”, inna amanta Mangadar songon na manimpuli hatana.

Ia amanta Mangadar Situmorang on, ndada holan na manggombar, alai parsiajar na utusan do muse jala pangaratto na patut sitiruon do, songon na boi berengonta di riwayat-na on.

 

Goar: Bonifasius Mangadar Situmorang

Huta Hatubuan: Toba, Samosir, Sumatera Utara

Tingki partubuna: 30 September 1964

Istri : Susana Ani Berlyanti

Anak : Yashinta Anna-Maria Easteefany, Yoshua Paradigma, Gratia Maria Tama Andarani

 

Parsikkolaan:

• Universitas Gadjah Mada Yogyakarta

• Curtin University of Technology Australia

• Murdoch University Australia

Parkarejoan:

• Dosen Ilmu Hubungan Internasional Unpar

• Dekan Fakultas Ilmu Sosial dan Ilmu Politik Unpar

• Rektor Unpar (sahat tu saonari).

Angka situan panjaha na manghoporluhon barita na asing na domu tu amanta on, boi ma tabereng dison.

 

  1. http://unpar.ac.id/wp-content/uploads/2015/11/Edisi-3-2014_S.pdf
  2. http://www.acuca.net/2015/12/ACUCA_3rd_QTR_2015.pdf 
  3. http://www.murdoch.edu.au/Research-capabilities/Asia-Research-Centre/_document/Annual-reports/AnnRep2010.pdf 
  4. http://id.portalgaruda.org/?ref=browse&mod=viewarticle&article=342528 
  5. Situmorang.Mangadar.1999. Organisasi Internasioal: Sebuah Imperatif Struktural. Perubahan Global dan Perkemangan Studi Hubungan Internasional. Bandung: Parahyangan Centre For International Studies (PACIS)
  6. http://id.portalgaruda.org/?ref=browse&mod=viewarticle&article=169344
Facebook Comments