Tag: Manjalo Tua ni Gondang

Mambuat Tua ni Gondang Na Sampulu Lima [Gondang Bolon/Gondang Sabangunan]

1. Gondang Mulajadi Nabolon

Amang panggual pargossi, parmaungmaung ni namora, amang pandenami,

Di haroronami rombongan na sian parserahan tu huta Sibabiat on, baen ma jolo gondang ni Debata Mulajadi Nabolon. Na manjadihon ulu manjadi simanjujung, na manjadihon pinggol manjadi situmangi, na manjadihon mata manjadi sipanonggor, na manjadihon baba manjadi simakkudap. Manjadihon tangan na manjadi simarjalo, na manjadihon pat manjadi simanjojak.

Jojak ma amatta na manggokhon, songoni nang hami rombonganna.

Amang panggual pargossi,

Baen ma jolo gondang ni Debata Mulajadi Nabolon. Na manjadihon butibutian botobotoan di na ganupganup desa di liat portibi on, di dolokdolok dohot di toruanna, asa horas ganup akka pamaretta na manguluhon, horas saluhut pangisina ni huta on na niulohonna.

2. Gondang Batara Guru

Mauliate ma, amang panggual pargossi.

Nunga dibaen ho sude akka pangidoan nami. Amang pandenami panggual pargossi, raja ni na malo. Pande pe hami, uppande do ho; malo pe hami, ummalo do ho. Sude pangidoan nami nunga hot dibaen ho.

Nunga dibaen ho gondang ni Omputta Debata Mulajadi, baen ma jo gondang ni omputta si Tuan Batara Guru, Batara Guru doli, Batara Guru boru, Batara guru situtu, na marhelahon Banebulan, na marsimatuahon Banesori. Parsori so haliapan, parsori so habubuhan. Unang haliapan dongantubu nami na manggokhon tu ulaon on, dohot ganup gokkon unang habubuhan. Asi ma rohani Debata, holong ma rohani Tuhan. Dapot na jinalahan, jumpang na niluluan. Tubu anak marsangap, boru martua, na boi pangalualuan, asa boi mardalan dohot denggan muse ulaon sisongon on ganup taon, makkorhon ganup bulan.

Amang panggual pargossi, baen jo gondang ni omputta si Tuan Batara Guru.

3. Gondang Bane Bulan

Amang panggual pargossi,

Mauliate ma di ho, nunga dibaen ho gondang ni opputta si Tuan Batara Guru, baen ma jolo ba: gondang ni si Raja Bane Bulan, na matabung i bonana, na matabung di pussuna, gabe ma amana, gabe dohot boruna. Baen jolo gondang ni Bane Bulan.

4. Gondang Bane Sori

Mauliate ma, amang panggual pargossi.

Nunga dibaen ho gondang ni opputta Bane Bulan, baen ma jo sarune dua.  Marbane sori ma hamu, parsori so haliapan parsori so habubuhan, unang haliapan unang habubuhan. Asa asi rohani Debata, holong roha ni Tuhan. Jumpang na jinalahan, dapot na niluluan.

Baen jo Amang, marbane sori ho, dua baen sarune i.

5. Gondang Saniang Naga Laut

Mauliate ma amang panggual pargossi,

Nunga dibaen ho gondang na hupangido, gondang ni Batara Guru, Bane Bulan, Bane Sori. Nunga dibaen ho gondang ni Debata na Tolu.

Baen ma jolo ba sigalumbang laut, gondang ni opputta Boru Saniang Naga Laut, paraek sitiotio, partambak simonangmonang, sibaen sigabegabe, sibaen sihorashoras. Baen jo, Saniang Naga Laut-hon jo, dua baen sarune mi, Amang.

6. Gondang Namartua Pusuk Buhit

Mauliate ma hudok hami tu ho, amang panggual pargossi, ala nunga dibaen ho gondang ni Saniang Naga Laut. On pe, amang pande hami, huhatahon ma on jo, hu Sombaon pohonpohonon, sipagabe na niula:

Hutonggo hupio hupangalualui Sahala ni da Ompung na Martua Pusuk Buhit.

Tuan ni junjunganna, Raja ni junjunganna.

Ampu tuan bonabona, raja ni bonabona, bonabona ni da Ompung na Martua Pusuk Buhit.

Marsahata hamu, marsaoloan dohot guru sodompangon ni da Ompung na Martua Pusuk Buhit.

Parlandong di dilana, parpustaha di tolonanna, parlaklak sipitu dopa.

Datu bolon ni da Ompung na Martua Pusuk Buhit, Sibaso bolon ni da Ompung na Martua Pusuk Buhit. Sibaso bolon, sibaso panurirang, sibaso pangarittari. Rittari ma hami pangaratto na ro mulak mandulo hutanami Sibabiat on.

Asi ma roham, lambok ma pusum. Siborok di guluan, ro pe hami na manjalahi hangoluan.

On parsattabian pangelekelekan tu hamu. Parbue ni satti madingin satti matogu sipatindak panaili sipaulak hosa loja, napuran sitirtiron na malambok pusu. Elekelek apoapo hu hamu, mangido sigabegabe sihorahoras.

Hata ni sidupsidupon do dohononnami tu hami.

Sahat sahat ni solu, sahat tu bontean, sahat hami ro nuaeng tu huta Sibabiat on, sahat ma tu panggabean.

Andorhas tu andorhis, andor siporapora, torhas ma torhis hami dohot nasida gabe jala ikkon mamora, horas hamu dohot ompungta na martua Debata

Amang panggual pargossi, baen jolo gondang hasadaon ni ompungta namartua Dolok na Ginjang, tuan ni junjungganni, raja ni junjunganna, ompu tuan bonabona. Raja bonabona, bonabona ni da Ompung di Dolok na Ginjang dohot na humaliangna saluhut.

Hot jo baen.

7. Gondang Sori Matua

Mauliate ma amang panggual pargossi, nunga dibaen ho gondang na hupangido i.

Baen ma jolo gondang ni Omputta si Raja Sori matua, Raja Uti, na pitu hali santi, na so haloppoan.

Asa parputi so haliapan ibana, parputi so habubuhan. Unang haliapan, unang habubuhan.

Baen jolo gondang ni oppungta si Sori Matua.

8. Gondang Raja Hatorusan

Mauliate ma amang panggual pargossi, amang raja ni na malo. Sude pangidoanhi, nunga hot dibaen ho.

Mauliate ma, sai hu malona ma ho.

On pe amang panggual pargossi, baen ma jo gondang ni ompung Raja Hatorusan i,

Sipatorus boaboa, sipatorus alualu tu Omputta Debata Mulajadi na Bolon.

Asa dipatorus sude nasa akka pangidoan ni hami akka na marsiak bagi on.

Baen jo ba amang gondang ni Raja Hatorusan i.

9. Gondang Si Boru Deak Parujar

Mauliate ma, amang panggual pargossi. Nunga dibaen ho gondang ni Ompu Raja Hatorusan i.

Baen ma jo gondang ni si Boru Deak Parujar, dohot si Raja Parodap.

Na tuat sian banua ginjang, sian ginjang ni ginjangan, sian langit ni langitan.

Sian batu martanggatangga, batu martinggitinggi, sian hotang marsuksang, bittang na marjorbut.

Hu Sianjur mulamula, Sianjur mula tompa, parsarsaran ni na marlundu, parserahan ni akka jolma.

Baen jolo gondang ni si Boru Deak Parujar dohot si Raja Parodap.

10. Gondang Sianjur Mulamula

Mauliate ma amang panggual pargossi, nunga dibaen ho gondang ni Si Boru Deak Parujar dohot si Raja Parodap.

Baen ma jolo gondang ni tano Limbong mulana.

Mula ni odungodung mula ni hatahata.

Mula ni jolma tubu, mula ni jolma raja.

Paraek, parhutuan, parpassim sipitu mata.

Pardolok Pusuk Buhit, horbo pelepeleanna

Baen jolo gondang ni Sianjur Mulamula i.

11. Gondang Lae Lae na Ualu

Amang panggual pargossi,

Baen jolo gondang ni desa na ualu

bulan sampulu dua, ari sitolupulu, mamis na lima.

Baen jo lae lae ni desa na ualu i.

Dua jo baen hamu jo sarune i, amang.

12. Gondang Raja Sori Matua

Mauliate ma ba amang panggual pargossi, amang raja ni na malo. Si bulung ni bulu do inna si bulung ni hoppohoppo, amang panggual pargossi, amang raja ni pangomo. Malo pe au, ummalo do ho. Sude pangidoanhu, nunga hot dibaen ho. Dohot sipalu ogung, nunga diatur ho.

Baen ma jo amang, gondang ni na hupangido on.

Andorang so dibaen ho gondangna, on do dohononnami tu na manggokhon hami, asa sai songon pangidoannami:

Tano ni Ajibata inna tano ni parkiloan. Marhite asi dohot holong ni Debata, saut ma pangidoan.

Mangido do hami sian saluhut rombongan tu Debata Parasiroha,

asa songon

Binanga ni Sihombing, pokkahan ni Tarabunga. Simbur ma magodang pomparanmu, pempeng matua, mardakka ubanna, limutan tanggurungna. Leleng hamu mangolu, saur ma hamu matua. Sinur na pinahan, gabe na niula.

Tu sanggar ma apporik, tu lobang satua. Tubu anak na marsangap, boru na martua. Sukkup allangonna, nang so pola loja mangula.

Amang panggual pargonsi,

Baen jo gondang ni Raja i, gondang si Sori Matua. Asa gabe jala horas, na manggokhon dohot na ginokkonna.

Baen ma jo ba.

13. Gondang Sori Mahumat

Mauliate ma ba dohononnami rombongan tu ho, nunga sonang hami na manortor i. Alai on do dohononhu hu hamu, hot ma jo baen sahali nai jo ba, amang panggual pargossi.

Gondang ni Raja i, Tuan Sori Mahumat. Partagas takkara dua, parhatian habonaran, parninggala sibola tali. Hu ginjang so ro mukkat, hu toru so ro  teleng. Parjanji dang boi muba, parhata dang boi mose.

Baen jolo ba gondang ni Tuan Sori Mahumat.

14. Gondang Lae Lae

Amang panggual pargossi, amang raja ni na malo.

Asa manortor ma jolo hami rombongan na ro sian desa na ualu tu huta Sibabiat on. Songon hata ni umpasa do dohonon nami:

Gambir sian Dairi, napuran sian Angkola. I bibir daina, i tolonan tabona. Patindak panaili, paulakhon hosa loja. Boi do ubat ni sahit, boi hitehite ni dorma.

Asi ma roha ni Debata Mulajadi, holong ma roha ni Tuhan, dapot ma na tajalahi, jumpang na niluluan.

Asa napuran tanotano, rangging marsiranggongan, tung pe badannami padaodao dohot saluhut keluarga na so boi dope ro sian parserahan, alai tondinami ma  marsigomgoman.

Jadi baen ma jolo amang, si lae lae ni tondi, sigabegabe sihorashoras i.

Baen hamu jo dua sarune i ba, parsarune.

Hot jo baen amang ba, ima Lae Lae.

15. Gondang Hata So Pisik

Mauliate ma amang pargossi nami,

Aso hubaen jolo tortor nami sangombas nai, marlogu so pisik ma ho jolo ho.

 

Pinauneune sian Hata Mangido Gondang ni Gondang Batak Saurdot

 

 

“Mamitta Gondang di Ulaon Saur Matua”

Horas ma di hita saluhutna.

Molo ro hita di sada ulaon saur matua, tontu ikkon takkas ma taboto songon dia harorotta disi. Somalna manggohi joujou do asa gabe ro hita, jala andorang ulaon saurmatua i, ipamasa do mariaraja laho mangarangrang akka aha na lao patupahon ni saluhut na ro di ulaon i.

Alai boi do tong hita ro tu si molo takkas ala naung sian dalanna (ala sian habatahon - agia pe lipe akka keluarga na mardok ni roha alani bernit ni sitaonon diparborhat ni natuatua naung saur matua i - gabe tarleleng nasida pabotohon tu hita) tama do ro hita tu ulaon i.
  1. Hulahula do?
  2. Dongan tubu do?
  3. Boru do?
  4. Dongan Sahuta?
  5. Manang sian punguan?

Manat ma jolo taboto sian dia do harorotta sian na lima on. Asa takkas taboto, songon hata ni natuatua do mandok: Songon parpeak ni parhundul do, parpeak ni na marulaon.

Jadi, Asa takkas Purba takkas Akkola, Asa takkas hita na marhulahula marboru maduma sahat mamora. Takkas ma attong taboto songon dia ruhutruhut ni parjambaron dohot sibahenonta, ima di partording ni adat na lao ulahononta.

Rupani, tulang ma hita di ulaon saur matua. Songononma hurang lobi annon sibaenonta disi. Ama ma na mate on.  Molo amangborutta do na mate on (mangalap borutta), Tulang ma hita di ulaon i.  Hita ma disi sibaen saput. Ala hita do sibaen saput, jambar ni sibaen saput ba tu hita ma. Molo pinahan do na pinatupa ni hasuhutan disi, ima na marmiakmiak, jambarta disi tulang, ba na marhorung ma, manang panuppakna, manangna upe suhut, manangna ihur ihur. Ima di hita. [Alai molo ina do na mate, hulahula ma sibaen saput. Ihurihur i gabe tu hulahula ma attong i, alana hulahula do disi sibaen saput. Molo ama na mate, tulang ma na mambaen saput. Molo ina na mate, hulahula ma mambaen saput.] Jadi songononma udutni partordingna molo tulang do hita disi.

  1. Tapasahat ma saput tu beretta i. Lapatanna, nang pe na mangamai hita disi (ala bapakta nama nian na marbere tu na mate on), tong do beretta i di ulaon i nang pe nian na marlae hita di tikki ngoluni na mate on.
  2. Sidung ma hita pasahat saput tu beretta i.  Jei dung sidung tabaen saputna, dungi diboan ma bakke ni na mate on tu alaman. Disi ma hita parjolo masuk. Somalna sibaen saput do parjolo masuk (alai boi do imbar sian i saguru tu pakkataion tikki mariaraja).
  3. Dung maralaman hita, marsiadopan ma hita tulang dohot hasuhutan. Makkatai ma hita parjolo. [Alai olo do nasida tong parjolo makkatai, ima na lao manomu hita]. Alai somalna hita do parjolo makkatai, ala hita do tulang, sibaen saput, na ro tusi. Songononma tadok: “Parjolo sahali, tama do attong hita mandok mauliate tu amatta na martua Debata siala di pangiringiringna tu hita ganup sahat ro di tikki on. Boi hita marhahipason dohot patupahon adat na hombar tu adat ni sihabatahonta tu ama na tahaholongi on, ima berenami. Amang boru, di na ro hami raja ni tulangmuna mandapothon hamu hasuhutannami  di pogu ni alaman ni bagas na marampang na marjual on, pangalaman ni anak pangalapan ni boru dohot pangalapan ni pasupasu. Nunga tipak hita paadopadop bakke ni ama na tahaholongi on, ima berenami. Raja ni amangboru nami, songon na nidok ni natuatua, “Hapur di tangan, hapur di appuan. Di tangga dope hami raja ni tulangmuna, nunga tarida bohi muna saluhut pinompar ni berenami, bohi na pasuan”. Takkas do attong huboto hami i, hubereng hami amangboru, tarida do hasadaon ni rohamuna. Tutur do hamu songon na marudur, udur do hamu songon na mardalan. Di dakka ni na marpussuk ratting na marbona ni ruttua, na marhahamaranggi songoni na mardongan sabutuha. Attong dohononnami attong songon na nidokni situatua: Balittang ma pagabe, tumundalhon sitadoan. Ari muna ma gabe saluhut hamu pinomppar ni berenami on, ala nunga tung takkas hamu hubereng hami sadari on marsipaolooloan”
  4. Dungi manjalo tua ni gondang ma.
  5. Parjolo ma tadok hata manjalo gondang mulamula. Tarsongon on ma hatana: “Amang pandenami parmaungmaung ni namora. Jongjong hami di jolo ni jabu on, pangattaran ni anak, pangembasan ni boru. Marmula do gabe, marmula do nang parhorason, baen hamu ma gondang mulamula i. Asa on ma mulana, ima di pangapudion ni berenami on, asa marmula sangap nang parhorasan tu  saluhutna hami na marhula marboru tu joloan ni ari. Dapothon ma”
  6. Dungi tadok ma hata manjalo gondang sombasomba. Tarsongon on ma hatana: “Mauliate ma amang di naung pinatupa muna. Nunga dipalu hami gondang mulamula i. Asa gabe toho ma songon na nidok ni natuatua, Sianjur Mulamula, Sianjur mulatoppa. Nunga dibaen hamu gondang mulamula, asa uduti hamu ma tu gondang somba somba. Asa marsomba hami tu amatta na martua Debata, marsomba hami tu sahala ni ompungnami naung jumolo dialap Tuhanta, marsomba hami tu sahala ni akka raja. Dapothon ma.”
  7. Dungi tadok ma hata manjalo gondang liatliat. Tarsongon on ma hatana: “Mauliate ma amang pandenami. Ima ulina, ima dengganna. Nunga dibaen hamu gondang sombasomba i. On pe amang pargonsi nami, asa palu ma muse gondang liatliat i. Asa mangaliat hami. Asa liat ma attong panggabean, liat parhorason di hami saluhut na marhulahula na marboru, tarlumobi ma di pinompar ni berenami on. Baen hamu ma gondang liatliat i. Dapothon ma.”
  8. Dungi pasahat parbue pir ma.  Na lao pasahat parbue pir, songononma tadokkon: “Amangboru, di parsahat nami attaran na bidang on, dison diboan hami do abbeabbe ni tangannami, tomutomu na huboan hami, huttihutti ni inanta soripada, ima nantulangmuna. Ima parbue pir, tarsongon ganti ni eme na marlundu. Asa marlundu ma attong panggabean, marlundu ma tong nang parhorasan tu hamu saluhut pinompar ni berenami tu joloan on. Asa jakkon hamu ma i raja ni amangboru nami, songon na nidok ni natuatua, “Pir ma pokki, bahulbahul passalongan. Pir ma tondimuna, dapotan pangomoan nang pansamotan”. Songoni ma jolo sidohononnami, amangboru, mardongan mauliate. Di tikki na manortor mangaliat on ma tapasahat parbue pir di tandok. Dung tapasahat parbue pir, tadok ma hata tu hasuhutan, tarsongon on ma hatana: “Jadi, songon i ma amangboru, hasahatan ni parbue pir nami. Tung humurang dihilala hamu, las ma rohamuna, uli nang tondimuna. Asa timbaho Karo ma binaen tu Sisalean, horas ma di hamu saluhutna pamoruan nami na manjalo, tu gandana ma tu hami tulangmuna na mangalean. Songoni ma hupasahat hami mardongan mauliate”
  9. Dungi ro ma hasuhutan manomba hita tulang jala tajalo ma jambar juhut. Sidung i, tadok ma hata tu hasuhuton. Tarsongon on ma hatana, “Gabe ma jala horas di hamu raja ni amangboru nami. Tadda do hamu na ringgas mangula. Dipajagar hamu do hami raja ni tulangmuna, songon indahan na las dohot aek sitiotio. Nunga dipasahat hamu jambar mangihut tu hami tulangmuna, sai mangihut ma attong pasupasu tumpahon ni amatta na martua Debata di hamu saluhut pinompar ni berenami. Dipasahat hamu do muse ima ringgit sitio soara, hasoloman ni hita jolma, ima ringgit na tinompa ni pamaretta. Asa jakkononnami attong amangboru, asa “Lao tu Sijarango, boluson do Sisalean. Horas ma hami saluhut hulahulamuna saluhut na manjalo, tu gandana ma di hamu sikkap ni na patupahon. Songoni ma sidohonan nami, mardongan mauliate”
  10. Dungi pasahat dohot ulos [Ulos on dang dibatasi molo tu tulang. Alai olo do tikki mariaraja didokkon hasuhutan mamatok, alani sibaenon. Didok hasuhutan ma “songononma ulos sibaenonmuna, tulang”, inna.]
  11. Dungi tadok ma hata manjalo gondang sitiotio dohot hasahatanna. Tarsongonon ma tadok: “Di hamu amang pandenami, pargonsi na malo, parmaungmaung ni namora. Asa songon nidok ni natuatua, “Tinahu ma mual na tio, binaen tu panuhatan. Nunga sahat be di hami akka pasupasu dohot silas ni roha dihami na marhula boru, asa baen hamu ma gondang sitiotio, las padomu ma tu hasahatan“

Tarsongoni ma na boi pinapungu sian pigapiga hali naung binereng na masa. Tu hamu natuatuanami, molo adong na lobi hurang, asa ajari hamu au.

Asa sian panurat, dohononhu do: Habang binsakbinsak, tu pandegean ni horbo
Unang hamu manginsak, ai i dope na huboto.

Horas ma di hita saluhutna.