ARGA BAEN SOARA MUNA I DI PILKADA ON

Foto: Metro TV

Songon naung somal, pittor songon na rame do molo naeng jonok tikkina laho mamillit akka parhalado di pamarentanta. Suang songon I ma tong di luat Samosir. Akka suara suara pe nunga sahat hu inganan naung ditontuhon di luat Samosir dohot na humaliang. Ido na umbahen ikkon ma nian manat bangso I mamillit jala arga situtu ma nian ibaen arga ni soara i.

Songon na nienet sian Konfrontasi, akka pengamat pe manghaporluhon do asa boi nian sude pangisi ni luat Samosir I mamillit akka wakil ni nasida, songon pandokan ni Saragi Simarmata, ima na nuaeng manjabat wakil ketua di PASADA.

“Molo sian Pemerhati Sosial Adat dan Budaya (PASADA), akka mihim-mihim di masa ni Pilkada on dang pola dao songon naung masa saleleng on di akka pemilu di Indonesia on. Mihim na somal diulahon  ima martiga-tigahon soara ni sada-sada pasangan calon manang paslon marhite na papunguhon soara siluman na terdaftar di DPT, dohot ma I tarmasuk akka na golput manang na so mamakke hak soarana”.

Mangihuthon pandohan ni amanta Saragi on, nunga adong 93.888 na terdaftar di DPT Pilkada Samosir 2015. Domu tusi, adong do muse surat edaran (SE) marnomor 729/KPU/X/2015 taringot tu  Pencermatan Ulang DPT (Daftar Pemilih Tetap), na ikkon dicetak do godang ni surat suara I mangihuthon godang ni na adong tarcatat di DPT, las ditambai ma dua satonga porsen sian godang ni DPT di ganup-ganup TPS (Tempat Pemungutan Suara). Artina, gabe adong ma annon 96.235 lobbar surat suara ditambai muse dohot 200 lobba surat suara ulang.

Apala impola ni SE I ima asa terjamin adong surat suara I. Alai on pe gabe sihabiaran do muse alana boi do on dileunghon manang dibahen tu naso tujuanna. Ido umbahen na ikkon manat hita mamarateatehon on jala unang pamura hita mandokkon olo tu manang ise pe na manjanjihon manang mangalehon akka mansam ni suap laho pamonanghon si anu di Pilkada on.

“Na porlu muse, molo siat hata sian hami nian, molo adong lobbar ni surat suara na sega, na so sah, na so tarpakke manang na lobi, tor ditutungi ma nian di ganup-ganup TIPS disi sidung ulaon penghitungan suara”, ninna si Saragi muse. Tujuanna ima asa boi denggan Pilkada on, dang adong pola martiga-tigahon soarana.

Ra marragam do pandapot ni akka na dongan nampuna hak suara i. Alai, molo na olo do hita asa dapotsa parhalado na dumenggan, rap nian hita manat mamarateatehon muse boha do hasil ni rekapitulasi suara I annon muse, ndang holan di TPS alai huhut sahat ma tu setiap tingkatan. Tudos tu si, naeng ma nian akka dongan na di Samosir rade mangihut-ihut boha do gerak-gerik ni KPUD (Komisi Pemilihan Umum Daerah) dohot akka pasangan calon na naeng sipilliton.

Boti ma.

Sumber:  Konfrontasi

Facebook Comments

Published by

Donald

A great Big Bang and then it all starts, we have no idea where will it end to ...

Komentar